قصة زينب المغدورة واستهتار الاحتلال الامريكي في العراق وصمت السياسيين المتشدقين بالسيادة والوطنية

 

على لسان والد زينب :

"يا ريت الطلقة صارت بيا ولا بزينب"

والد زينب البالغة من العمر ١٥ عاماً والتي راحت ضحية رصاصة طائشة بالقرب من ميدان رماية في بغداد، يروي تفاصيل الحادثة:

"بنتي زينب تعينني بالزرع وآني رجال فلاح. نطلع الساعة ٧ الصبح ونشتغل تقريباً ٣ ساعات ونرجع للبيت. صار تقريباً سنتين على هاي الحالة. بس هالمرة من طلعنا إجت طلقة طائشة من المطار وصابت زينب.

احنه من نگعد بالزرع الواحد قريب على الثاني وماكو بيننا أكثر من مترين. ما سمعت إلا صاحت يابه!

زينب من تصيح يابه آني متعود أروح أشوفها شتريد، لكن بهاي اللحظة اللي صاحت بيها يابه باوعت عليها مضروبة بظهرها! والله گطعت گلبي! شلتها مسافة بعيدة وخفت عليها لا توگع أو تتعور.

احنه بالعادة نطلع بدون ريوگ نكمّل شغلنا وبعدين نتريگ. بعد ما اجتها الطلقة يبست شفايفها، وهي لا ماكلة ولا شاربة.

قبلها احنه ناشدنا واجتنا قوات گلنالهم ليش إلا يروح واحد من عدنا يلا ذاك الوكت تتخذون إجراء؟ وهاي مو أول حادثة، والدي توفى بنفس السبب بـ ٢٠٠٤ واحنه ما خلينا مكان وما ناشدنا، والإصابات بالمنطقة بالعشرات".

زينب ضحية رصاصات طائشة مصدرها ميدان رماية عسكري يقع بالقرب من منطقة سكناها في قضاء ابي غريب, هذه الحادثة لم تكن الاولى من نوعها فيما يطالب الاهالي هناك بضرورة وضع حل عاجل لانهاء الخطر المحدق بهم.

روى  اخو الضحية كيف وقعت الحادثة واين( لبعض الوكالات الاخبارية)

يشير اهالي المنطقة الى ان هذه الحادثة لا تعد الاولى من نوعها إذ ان اصابات عدة سجلت لاشخاص عديدين نتيجة رصاصات طائشة ترمى في ميدان الرماية القريب من المنازل السكنية.

يشكل ميدان الرمي الذي يقع خلف هذه التلة خطرا كبيراً على الاهالي الساكنين بمحاذاته في منطقة ابي غريب الذين يطالبون الجهات المختصة بابعاد خطره عنهم.